Briogáidí Idirnáisiúnta go Cúba

international | anti-war / imperialism | opinion/analysis Monday July 07, 2003 12:18 by Seán

Is í an cheist atá á cur agam ná an bhfuil slí eile ann chun ár laethanta saoire a chaitheamh, gan ár gcuid airgid a chur i bpócaí rialtais an chogaidh is déanaí.

Tá muid ag teacht chuig an am sin den bhliain arís a thosaíonn na comhlachtaí turasóireachta ag obair lenár mealladh chuig Mallorca, Gran Canaria, an Tuirc nó eile. Agus más ar an ollscoil atá tú, is cinnte go raibh tú báite faoi thonn fógraí don J1 go dtí na Stáit Aontaithe.

Ach is í an cheist atá á cur agam ná an bhfuil slí eile ann chun ár laethanta saoire a chaitheamh, gan ár gcuid airgid a chur i bpócaí rialtais an chogaidh is déanaí (páirt a dó san Iráin i gceann cúpla míonna?)?

Nó níos fearr arís, trínár laethanta saoire a chaitheamh ann, an féidir linn tacaíocht a léiriú do thíortha eile ina bhfuil gluaiseachtaí nó rialtais a bhíonn ag streachailt faoi chuing ‘rialtais an chogaidh’?

Bhí fonn orm i gcónaí dul go Cúba, mar shampla, agus anuraidh fuair an seans nuair a bhuail mé le ball de chuid an Ghrúpa Thacaíochta Chúba i mBaile Átha Claith ag caint de chuid Aleida Guevara (iníon Che).

D’inis sé dom faoi na Briogáidí oibre a théann amach go Cúba agach bliain ón tír seo agus shocraigh mé dul ann.

Bhain mé an oiread sin suilt as an bhriogáid gur eagraigh mé caint ar an mBriogáid nuair a d´fhill mé, rud a mholann go leor d’eagraithe na mBriogáidí Idirnáisiúnta, nó níl an t-airgead nó na baill acu chun dul san iomaíocht i ndáiríre le comhlachtaí móra turasóireachta.

Anseo thíos, tá na ceisteanna a chuir mé ar Declan McKenna ó Ghrúpa Tacaíochta Chúba faoin mBriogáid Idirnáisiúnta Oibre:

Cad chuige a roghnaíonn daoine dul go Cúba?
“Fáthanna éagsúla – le tacaíocht polaitiúil a léiriú, mar shampla amháin; i gcás daoine eile, is mian leo an dul chun cinn sóisialta agus a thionchar a fheiceáil; daoine eile, téann siad de bharr na fiosrachta. Don chuid is mó, ámh, téann daoine go Cúba chun foghlaim faoi Chúba, chun foghlaim faoin Réabhlóid agus chun fáil amach cad a dhéanann Cúba difriúil.”

Cad é go díreach é an Bhriogáid Idirnáisiúnta Oibre?
“Grúpaí as eagraíochtaí dlúthpháirtíochta ó cheann ceann na hEorpa a chomhdhéanann Briogáid Idirnáisiúnta Oibre. Cónaíonn na Brigadistas ar feadh 3 sheachtain i gcampa atá tógtha go spéisialta don Bhriogáid agus atá lonnaithe i ndeas do Havana, áit a gcuidíonn siad le hobair thalmhaíochta agus obair thógála taobh le Cúbaigh.

Glacann na Brigadistas páirt i gclár leathan, a chlúdaíonn cuairteanna ar scoileanna, ospidéil, ceardchumainn agus monarchana agus dá thoradh sin, faigheann an Brigadista léargas áirithe ar shaol an ghnáthdhuine sa tsóchaí Cúbach agus tugann sé seans dóibh bualadh le gnáth-Chúbaigh.

“Tá an Bhriogáid Oibre eagraithe ar bhonn oideachais agus polaitiúil – tugtar an deis do dhaoine foghlaim faoi Chúba agus faoi mhuintir Chúba agus tacaíocht a léiriú do cheart féintreoraithe Chúba.

Eagraítear an Bhriogáid dhá uair sa bhliain i gcomhar le ICAP (Instituto Cubano de Amistad con los Pueblos) chun tacaíocht a léiriú le muintir Chúba agus lena Réabhlóid trín obair, an éisteacht, an fhoghlaim agus fiú amháin trína bheith ansin, dar le McKenna.

“Tá na Briogáidí Oibre go Cúba a n-eagrú le tríocha bliain anuas (cé gur seo an t-aonú bhliain déag don Bhriogáid Oibre Éireannach dul go Cúba) agus chuidigh siad le go mór le líonra domhanda d’eagraíochtaí dlúthpháirtíocht a bhunú.”, ar seisean.

Caitear an chéad choicís ag obair agus an tseachtain dheireannach ar thuras treoraithe thart timpeall ar Chúba.

Nuair a bhí mé féin ann, bhí an t-ádh linn gur tugadh muid ar cuairt chuig Iarsmalann Che Guevara. Cuimhneachán iontach ar fad a bhí ann.

Deir paimfléid eolais de chuid an Ghrúpa Tacaíochta Chúba gur chóir cuimhneamh, in ainneoin an dul chun cinn iontach atá déanta ag Cúba le blianta anuas, gur tír i mbéal forbartha í atá ag dul i ngleic le smachtbhannaí geilleagracha, neamhchinnteacht faoi ola agus faoi phraghasanna príomh-earraí, agus neamhchothromaíocht i dtaca le trádáil idirnáisiúnta de. Deir an paimfléad, leis, gur féidir go n-aimseoidh Brigadista lochtanna ar an chóras i gCúba ach go dtagann na Cubaigh orthu freisin agus gur sin an fáth go gcreideann siad go bhfuil an Réabhlóid ag leanúint leis.

Cé atá i dteideal dul leis an Bhriogáid?
“Caithfidh Brigadistas bheith ina mball de Ghrúpa Tacaíochta Chúba (ach is féidir ballraíocht a shaothrú le d’iarratas).

Bíonn daoine ó gach cinéal cúlra, aois agus ceantar in Éirinn ag dul leis Bhriogáid.

“Bíonn ar na Brigadistas bheith in ann comhoibriú lena chéile, uaireanta faoi bhrú agus bheith sásta páirt a ghlacadh in obair dlúthpháirtíochta Chúba nuair a fhilleann siad.”, deir McKenna.

De réir Ghrúpa Tacaíochta Chúba, tugann an Bhriogáid seans do dhaoine tacaíocht phraicticiúil a léiriú don phobal Cúbach ar laethanta saoire oibre i gCúba, taobh le Brigadistas eile ó gach cearn den Eoraip agus mic léinn Chúbacha.

Bíonn an bhriogáid ar siúl dhá uair sa bhliain, i mí Mheán Fómhair (30 Lúnasa - 20 Meán Fómhair) agus i mí na Nollaig (13 Nollaig 2003 - 03 Éanair 2004). Is iad na dátaí deiridh do na Briogáidí Oibre ná deireadh mhí Meitheamh agus deireadh mhí Mheán Fómhair.

Thug Declan an cinéal eolais seo domsa agus mé ag fiosrú faoin Bhriogáid Oibre anuraidh ach mar a d´fhoghlaim muid agus muid ansin, níor tugadh an eolas céanna do roinnt de na Brigadistas as tíortha eile.

Bhí roinnt Brigadistas ann a chaith a gcuid ama ag gearán faoi seo agus siúd eile agus de bhrí sin, chaill siad amach ar shaol shóisialta an champa; ar na díospóireachtaí agus an greann a bhí againn le Luis (comhordaitheoir an champa), ar na cluichí peile faochmhara idir tíortha Ceilteacha (agus an Bhreatain) agus tíortha an Meánmhuirí, ar na hoícheanta salsa nuair a rinne muid go léir amadáin dínn féin, agus ar ndóigh an seanleaid ón Ghréig a choinnigh an chraic ar siúl go luath sa maidin lena bhosca ceoil.

Bhain an chuid is mó againn an-sult as an mBriogáid agus ‘beidh muid ar ais’ ach mar a d’fhoghlaim na Brigadistas ón Iorua, ní fiú dul ar an mBriogáid Oibre muna bhfuil uait ach laethanta saoire saor i gCúba.

Tá tuilleadh eolais ar fáil faoi na Briogáidí ón Cuba Support Group,
15 Cearnóg Mhuirfean, Baile Átha Cliath 2
Fón: (01) 8436448, 087 6785842
ríomhphost: cubasupport@eircom.net